يا عاقل إعقل !

شف كيف وجهك ينحني شف كيف عظمك يكسـرا
شف كيف ضعفك يبتدي شف كيف راسك فيك شاب
دنياك يا إبـن آدم غـرورِ لـو يزيـن المظهـرا
لا تامنـه إلا كمـا تامـن علـى العنـز الذيـاب
والله لـو تعطـي جبـالِ مـن ذهبهـا الأصفـرا
لابـد مـن يـومِ تبـي تمـلا مناخيـرك تـراب
كم من ضعيفِ غرتـه وأقفـى ولا أحـدِ بـه درا
هاذي القبـور الصامتـه يامـا بداخلهـا جـواب
ياما خـذت مـن جيلنـا ويامـا خـذت جيـلِ ورا
ياما خذت من شايـب ويامـا خـذت منـا شبـاب
ياموت مـا خليـت أحـد لا بـا المدايـن والقـرا
كم واحـدِ مـن بيننـا شلتـه لمجهـول الغيـاب
ياموت وش خليـت لـه غيـر النصايـب والثـرا
ياويـل قلـبِ مارجـع لله وأسلـم لــه وتــاب
يا عاقل أعقل مـاورا هـا المـوت شـيِّ يشتـرا
يا عاقل أعقل مـاورا قصـة جهنـم مـن عـذاب
يا عاقل أعقل مابقـي لـك مثـل مـا فاتـك تـرا
يا عاقل أعقل وإمسح الصفحه ترا القصـه كتـاب
إعمـل لنفسـك لا يغـرك هـا الزمـان الأغبـرا
باكر تـرى ملفـاك قبـرِ فوقـه ينـوح الغـراب